Mentre que lo vòt sus lo projècte de lei dau govèrn sus lu Juecs Olimpics e Paralimpics (JOP) d’ivèrn 2030 si deuria tenir lo 6 de genoier dau 2026, la lista Nissa Frònt Popular denóncia aquesta lei d’excepcion que, dins la sieu part securitària votada dimècres a l’assemblada nacionala, prevé la generalizacion de la vidèosusvelhança e de derogacions liberticidi e atemptatòrii ai règlas d’urbanisme e a l’environament, rendent mai dificili li contestacions e restrenhent li libertats.
La crisi dau comitat d’organizacion d’aquelu JOP d’ivèrn 2030, la contestacion de mai en mai granda dins lu territòris pertocats e lo tot bèu recent debat parlementari faguèron remembras aqueli darrieri setmanas qu’aquesto projècte d’organizacion d’aquelu JO avia de plomb dins l’ala.
Dins la continuitat dei presas de posicion ja anciani dei compauantas de la lista NiFP (Rassemblament ciutadan ViVA!, La França Insomesa, Novèu Partit Anticapitalista, Ensemble Senèca Alternativa, Assemblada Occitana), vaquí dètz bòni rasons de far remembrar perqué s’opauam an aquesto projècte:
1. Jamai li populacions dei territòris concernits non siguèron consultadi sus aqueu projècte: lo negament democratic es totau;
2. Un nombre creissent de scientifics, d’ONG e associacions de defensa de l’environament dei montanhas s’opaua an aquesto projècte, per de rasons ecologiqui de preservacion dei mitans geografics montanhòus;
3. Aquesto projècte es un nonsens ecologic: se si realiza, generaria 800 000 tònas de CO2, au mesprètz dei enjuecs environamentaus e de la nòstra region ja particularament tocada per lo rescaufament climatic;
4. Aquesto projècte es una aberracion ecologica per una montanha que fonde: au prelevament massís d’aiga per lu canons de nèu s’aponderian toti li construccions de betum (patinadoira, vilatge olimpic…) generatori de CO2 suplementari mentre que, d’un autre costat, aqueli construccions non correspòndon lo mai sovent a minga besonh reau e seràn pas necessàriament utili au delà dei JOP 2030;
5. Aquesto projècte es roïnós sus lo plan financier: se si realiza, segon l’inspeccion generala dei finanças, 4 miliards d’euros serian gastats dont 2,5 d’argent public, au detriment dei besonh sociaus e environamentaus dei territòris pertocats (projèctes alternatius a la nèu qu’es a desaparéisser, desvolopament dau ferroviari, equipaments de proximitat, reduccion dei inegalitats, renovacion energetica dau bastit…) e emb una agravament dei inegalitats entre lu nòstres territòris, en favor d’aquelu que serian concernits per lu JOP;
6. Lu emplecs promés serian per l’essenciau reservats a quaucu sits e lo mai sovent precaris e temporaris, mentre que son d’emplecs estables e perennes, d’utilitat sociala e ecologica, que li populacions de toi lu nòstres territòris an da besonh;
7. Aquesto projècte agravaria la crisi dau lotjament e la saturacion dau nòstre territòri: accentuacion de la pression immobiliària, inflacion, caça ai paures e ai SDF, dins l’optica d’un sobretorisme qu’estofa la vida economica e risca de si revirar un jorn còntra lo torisme eu mesme;
8. Aquesto projècte si marca dins una vision d’un autre atge dau desvolopament economic, fondat sus l’evenimenciau, lo tot au betum e lo tot ai pítols, la concurréncia e toti e toi còntra toti e toi, au mesprètz dei besonhs dei populacions e en particular dei mai modèsti e dei mai fragili;
9. Aquesto projècte si marca dins una vision de l’espòrt qu’es aquela de l’espòrt-espectacle, fondat sus dei espròvas esportivas practicadi sobretot, contràriament ai JO d’estiu, per de mitans privilegiats (espòrts d’”alcòva”);
10. Aquesto projècte es particularament aberrant per Nissa e la metropòli dont manca d’equipaments de proximitat accessibles a toti e toi, e la sieu necessària renovacion.
La lista Nissa Frònt Popular prepaua la cessacion dei construccions envisatjadi e s’opaua au projècte de construccion costós e susdimensionat de la patinadoira olipica a Nissa. La lista NiFP s’opaua tanben a l’utilizacion de l’estadi Allianz Riviera per aquelu JOP d’ivèrn 2030 que penalizaria l’OGC Nissa en empedissent lo debanament dei sieus rescòntres a domicili pendent manti setmanas. La lista Nissa Frònt Popular sosten lu collectius ciutadans JOP que demandan “l’anullacion dau contracte olimpic lo temps que sigue organizat una vertadiera informacion e consulta dau public conformament ai obligacions constitucionali e internacionali”
La lista Nissa Frònt Popular reafirma la prioritat ai equipaments de proximitat dins lu quartiers e ai ajudas au movement associatiu per que l’accès ai practicas esportivi sigue un drech per toti e toi, per que l’espòrt sigue sinonim de cooperacion e de ciutadanetat, e pas de competicion brutala de toti e toi còntra toti e toi.
Per la lista NiFP, es indispensable un audit complet dei equipaments esportius metropolitants existents (estat, chifras de frequentacion, grad de satisfaccion dei usatgier.as…) per permetre de definir li soli construccions que respòndon ai besonhs reaus.
En matèria de desvolopament economic, la lista Nissa Frònt Popular fa la chausida de l’ecologia, de la creacion d’emplecs estables e d’utilitat sociala e ecologica, e d’un torisme mestrejat, sociau e ecologic, de la mar a la montanha, que respècta lu estatjantas e lu estatjants de Nissa e de la metropòli.
La mobilizacion còntra lo projècte dei JOP 2030 s’es alargada aqueli darrieri setmanas e un molon de problèmas de finançament, d’organizacion e de chausida dei sits, lòngtemps esconduts, son desenant desvelats.
Es vengut lo moment de mantenir la mobilizacion ciutadana, associativa e politica còntre aquesto projècte nefast, destructor e autoritari!
